LEIÐINN ER LÍF

Ýmis ónot fylgja því að vera á lífi.  Þau eru oftast meinlaus.  Með áróðri má þó draga þau í flokk kvilla og sjúkdóma svo hagnast megi á að selja lækningu.  Fyrir um hálfri öld hófst árangursríkasti áróðurinn af þessu tagi.  Meinið sem blásið var upp hét leiði.  Meðalið við því varð ein mikilvægasta markaðsvara Vesturlanda: Afþreying.  Sérstakt heimilistæki var fundið upp til að lina þjáningar okkar og það varð brátt að hjarta heimilisins. 

Eins og gjarnan er með afar ábatasama vöru hækkaði meðalið í tign og varð að hugmyndafræði, næstum trúarsetningu: Afþreying sem lífsfylling.  Meðalið varð að tilgangi.  Þetta var afdrifaríkt fyrir allar listir og gjörbreytti tónlistarheiminum.

Það væri kíkótískt áræði að leggja þetta meðal spjótum.  Það er rótfast í hagkerfinu og þar með lífinu.  Kannski má samt glósa nokkur orð um málið.

 1) Ég vinn og samkomulag er um að auk mín hagnist einhver annar á vinnunni.  Utan vinnu á ég frítíma.  Eitt sinn fór hann í hvíld, skemmtun, dundur og snatt eða spjall.  Og þótt kannski væri erfitt að koma því í kring gat ég jafnvel látið mér leiðast.

2)  Svo kom maður og sagði: "Hvíld og skemmtun eru gamaldags.  Nú heitir það afþreying.  Með henni skal ég innrétta frítíma þinn, annars kemst leiðinn þar inn eins og rotta."  Eftir þetta gat líka einhver hagnast á frítíma mínum.  Ég veit ekki hvort ég samþykkti það. 

3) Frítíminn, minn tími, er ÞAÐ EINA SEM ÉG Á. Hann er mjög eftirsótt góss því hersingar byggja hag sinn á honum.  Ég get séð af einhverju, en förum hægt í sakirnar.  Annars er ég að gengisfella mitt líf, með öðrum orðum: Mig.

4)  Ágangur mangaranna er mikill.  "Slepptu þér " segja þeir, "gefðu leiðanum langt nef".  Og menn sleppa sér: Afþreying er ekki eitthvað sem ég hlusta á heldur geng ég inn í heim hennar.  Hún stækkar mig ekki heldur gleypir.  Þetta er snjallt: Auk þess að græða á frítíma mínum má ýta með henni á skoðanir mínar.  Stjórna mér svolítið.

5)  Engar áhyggjur samt.  Það er ekki hægt að slökkva á fólki nema í bili.  Fylgjumst bara með því hvort við stjórnum afþreyingunni eða hún okkur.  Fíknin liggur í leyni og fíklar slökkva á sjálfum sér.  Og ef illa fer verður afþreying krabbamein tímans.

6)  Komdu leiði og gerðu mig að konungi í eigin ríki á ný.  Ríki míns eigin tíma þar sem þú ert hreyfill hugarflugsins.